ٹریفک قوانین کی خلاف ورزیوں پر 6 ہزار موٹر سائیکلیں ضبط

ٹریفک قوانین کی خلاف ورزی کرنے والوں کو سبق سکھانے اور قانون کا پابند بنانے کیلیے 6 ہزار موٹر سائیکلیں ضبط کر لی گئیں۔
قانون کا احترام ہر شہری پر فرض ہے اور وہی قومیں ترقی کرتی ہیں، جہاں قانون کی پاسداری کی جاتی ہے اور قانون شکنی پر جرم وسزا پر انصاف کے ساتھ عملدرآمد کیا جاتا ہے۔
سعودی عرب کا شمار بھی ایسے ممالک میں ہوتا ہے، جہاں جرم وسزا کا کڑا نظام ہے، جس سے کوئی بھی بچ نہیں پاتا ہے۔
سبق ویب سائٹ کے مطابق سعودی محکمہ ٹریفک نے قوانین کی متعدد خلاف ورزیوں پر 6 ہزار 459 موٹر سائیکلیں ضبط کر لی ہیں۔ یہ موٹر سائیکلیں گزشتہ ایک ہفتہ کے دوران مملکت کے مختلف شہروں سے ضبط کی گئیں ہیں۔
محکمہ ٹریفک نے بتایا کہ سب سے زیادہ گاڑیاں دارالحکومت ریاض ریجن میں 3094 ضبط کی گئی ہیں۔ اس کے بعد جدہ میں 2037 موٹر سائیکلوں کو تحویل میں لیا گیا ہے۔
مشرقی ریجن میں 588، مکہ مکرمہ میں 201، مدینہ منورہ میں 134، طائف میں 62 اور جازان میں 42 موٹر سائیکلیں ضبط کی گئیں۔
محکمہ ٹریفک نے موٹر سائیکل چلانے والوں کو سختی سے ہدایت کی ہے کہ وہ ٹریفک قوانین کی پابندی کریں۔ خلاف ورزی پر موٹر سائیکل ضبط ہوگی اور یہ کسی بھی حال میں ناقابل واپسی ہے