روس کا ایٹمی صلاحیت والے زیرِ آب ڈرون کا کامیاب تجربہ

روسی صدر ولادیمیر پیوٹن نے دوسرا ایٹمی ہتھیاروں کا تجربہ کر کے امریکی صدر ٹرمپ کو چیلنج کر دیا ہے۔
بین الاقوامی میڈیا رپورٹس کے مطابق روس نے ایٹمی صلاحیت رکھنے والے زیرآب ڈرون “پوسائیڈن” کا کامیاب تجربہ کیا ہے۔
صدر پیوٹن کا دعویٰ ہے کہ ڈرون ایٹمی طاقت سے چلتا ہے اور کسی بھی برِاعظم تک پہنچ سکتا ہے اس جدید ڈرون کو روکنے کا کوئی طریقہ موجود نہیں، پوسائیڈن ڈرون کی رفتار اور گہرائی تک غوطہ لگانے کی صلاحیت دنیا میں بےمثال ہے۔
روسی فوج کے مطابق پوسائیڈن ڈرون ایک کلومیٹر سے زائد گہرائی میں کام کر سکتا ہے اور ڈرون کی رفتار 70 ناٹ تک پہنچ سکتی ہے اور یہ ریڈار سے پوشیدہ رہتا ہے، پوسائیڈن ڈرون دو میگا ٹن تک ایٹمی وار ہیڈ لے جانے کی صلاحیت رکھتا ہے۔
صدر پیوٹن کا کہنا ہے کہ مستقبل قریب میں کسی ملک کے پاس ایسا ہتھیار نہیں ہو گا۔
ایٹمی میزائل بورویستنک کے تجربے کے بعد روس نے جدید آبی ڈرون کا تجربہ کیا۔ روسی صدرپیوٹن نے اتوار کو بورویستنک میزائل کے تجربےکی نگرانی خود کی تھی۔ بورویستنک میزائل لامحدود رینج رکھنے والا ایٹمی صلاحیت کا حامل ہتھیار ہے۔