پاکستان کویتی ولی عہد کے دورۂ پاکستان کی میزبانی کا منتظر ہے:وزیراعظم شہباز شریف

نیویارک : وزیراعظم شہباز شریف کا کہنا ہے کہ پاکستان کویتی ولی عہد کے دورۂ پاکستان کی میزبانی کا منتظر ہے تاہم دورے کی تاریخوں کا تعین سفارتی ذرائع سے کیا جائے گا۔
تفصیلات کے مطابق وزیراعظم شہباز شریف نے اقوام متحدہ کی جنرل اسمبلی کے اجلاس کے موقع پر کویتی ولی عہد شیخ صباح الخالد سے اہم ملاقات کی۔
ملاقات میں دونوں رہنماؤں نے پاک–کویت دیرینہ، تاریخی اور برادرانہ تعلقات پر اطمینان کا اظہار کیا۔
وزیراعظم نے کویتی امیر کے لیے نیک خواہشات کا اظہار کرتے ہوئے کہا کہ پاکستان اور کویت ہمیشہ ایک دوسرے کے ساتھ کھڑے رہے ہیں۔
انہوں نے حالیہ سیلاب پر کویت کی جانب سے یکجہتی اور تعاون پر ولی عہد کا شکریہ بھی ادا کیا۔
ملاقات کے دوران وزیراعظم شہباز شریف نے تجارت، سرمایہ کاری اور صحت کے شعبوں میں تعاون کو فروغ دینے کے عزم کا اعادہ کیا اور کہا کہ پاکستان کویتی ولی عہد کے دورۂ پاکستان کی میزبانی کا منتظر ہے۔ دورے کی تاریخوں کا تعین سفارتی ذرائع سے کیا جائے گا۔
دونوں رہنماؤں نے مشرق وسطیٰ کی صورتحال اور فلسطینی عوام پر ڈھائے جانے والے مظالم پر بھی تبادلۂ خیال کیا۔
کویتی ولی عہد نے فلسطینی عوام کی آواز بلند کرنے اور خطے میں امن کے لیے پاکستان کی سفارتی کوششوں کو سراہا۔
ملاقات میں اس بات پر بھی اتفاق کیا گیا کہ پاکستان اور کویت عالمی فورمز پر قریبی تعاون جاری رکھیں گے۔