کوئٹہ (9 اکتوبر 2025): پاک ایران سرحد پر بلوچستان کے علاقے ماشکیل میں کٹاگر کراسنگ پوائنٹ کا افتتاح کر دیا گیا۔
بلوچستان کے عوام کیلیے تجارت، عوامی روابط اور خوشحالی کے نئے دور کا آغاز ہوگیا۔ آئی جی ایف سی بلوچستان ساؤتھ نے کٹاگر کراسنگ پوائنٹ کا باضابطہ افتتاح کیا۔
رکن صوبائی اسمبلی میر زابد علی ریکی سمیت مقامی عمائدین اور تاجر برادری نے افتتاحی تقریب میں بھرپور شرکت کی۔ کٹاگر کراسنگ پوائنٹ کھولنے کا فیصلہ دالبندین میں 2 جولائی 2025 کو گرینڈ جرگے میں کیا گیا تھا۔
وزیر اعلیٰ بلوچستان سرفراز بگٹی اور کور کمانڈر بلوچستان نے مقامی لوگوں کیلیے راہداری کھولنے کا فیصلہ کیا تھا، کٹاگر راہداری بلوچستان کے سرحدی علاقے ماشکیل میں پاکستان اور ایران کے درمیان رابطے میں اہم کردار ادا کرے گی۔
ایف سی بلوچستان نے ضلعی انتظامیہ اور ایرانی حکام کے ساتھ قریبی رابطے، تعاون اور انتھک محنت سے تمام انتظامی امور مکمل کیے، مسلح افواج اور عوام کے بھرپور تعاون سے بلوچستان امن و امان اور پائیدار ترقی کی راہ پر گامزن ہے۔
