منشیات خلیجی ممالک اسمگل کرنے والا بین الاقوامی نیٹ ورک بے نقاب

راولپنڈی: اینٹی نارکوٹکس فورس (اے این ایف) نے نوجوان جوڑوں کو ورغلا کر منشیات خلیجی ممالک اسمگل کرنے والے بین الاقوامی نیٹ ورک کو بے نقاب کردیا۔
تفصیلات کے مطابق اینٹی نارکوٹکس فورس (اے این ایف) نے بین الاقوامی منشیات اسمگلنگ نیٹ ورک کے خلاف بڑی کارروائی کرتے ہوئے ہیروئن اسمگل کرنے والے بین الاقوامی نیٹ ورک کو بے نقاب کر دیا۔
ترجمان اے این ایف نے بتایا کہ یہ نیٹ ورک متحدہ عرب امارات میں سرگرم تھا اور غریب، کم پڑھے لکھے نوجوان جوڑوں کو ورغلا کر منشیات اسمگلنگ کے لیے استعمال کرتا تھا۔
ترجمان کا کہنا تھا کہ کارروائی انٹیلی جنس اطلاعات کی بنیاد پر کی گئی جس کے نتیجے میں نیٹ ورک کا سرغنہ ندیم خان سمیت 11 افراد گرفتار کر لیے گئے۔ گرفتار افراد میں چار خواتین اور ایک فارماسسٹ بھی شامل ہیں۔
ترجمان نے کہا کہ نیٹ ورک منشیات کو کیپسولز کی شکل میں پیٹ میں چھپا کر بیرونِ ملک منتقل کرتا تھا، دو ہوائی اڈوں سے چار نوجوان جوڑوں کو اسی طریقے سے گرفتار کیا گیا، جن کے پیٹ سے ہیروئن بھرے کیپسول برآمد ہوئے۔
اے این ایف نے بتایا کہ بین الاقوامی نیٹ ورک کے مزید تین سہولت کار بھی گرفتار کیے جا چکے ہیں، جبکہ تفتیش کے دوران نیٹ ورک کے دیگر مفرور ملزمان کی نشاندہی کر لی گئی ہے۔
ترجمان کے مطابق اے این ایف کی بہتر مانیٹرنگ اور مؤثر انٹیلی جنس نیٹ ورک کے باعث یہ خطرناک اسمگلنگ گروہ بے نقاب ہوا۔
ادارے کا کہنا ہے کہ مفرور ملزمان بھی جلد قانون کی گرفت میں ہوں گے اور منشیات کے خلاف جنگ ہر سطح پر جاری رہے گی۔