10 کلو آٹے کا تھیلا 905 روپے اور روٹی کی قیمت 14 روپے مقرر کر دی : عظمیٰ بخاری

پنجاب حکومت نے آٹے کے 10 کلو تھیلے کی قیمت 905 روپے مقرر کر دی۔
وزیر اطلاعات عظمیٰ بخاری نے آٹے اور روٹی کی قیمتوں کا نوٹیفکیشن بھی شیئر کر دیے جس کے مطابق 20 کلو آٹے کے تھیلےکی قیمت 1810 روپے مقرر کی گئی ہے۔
روٹی کی قیمت 14روپے مقرر کی گئی ہے۔
وزیر اطلاعات نے کہا کہ سیلاب کی آڑ میں قیمتیں بڑھانے کی اجازت نہیں دی جائےگی اس حوالے سے پنجاب حکومت نےنوٹیفکیشن جاری کر دیا ہے۔
دوسری جانب چیئرمین فلور ملز ایسوسی ایشن سندھ جنید عزیز نے اپنے بیان میں کہا کہ گندم اور آٹے کی قیمتوں میں مزید اضافے کا خدشہ ہے، پاکستان میں گندم مہنگی جبکہ عالمی مارکیٹ میں گندم سستی مل رہی ہے۔
جنید عزیز نے کہا کہ حکومت نے گندم کی امپورٹ پر جلد فیصلہ نہ کیا تو آٹے کی قیمتوں میں مزید اضافہ ہوگا، ایک ماہ میں گندم اور آٹے کی قیمتوں میں ریکارڈ اضافہ ہوا ہے۔
یکم اگست سے اب تک گندم کی قیمت میں 35 روپے اضافہ ہوا جبکہ آٹے کی قیمت میں 29 روپے بڑھ گئی۔ گندم کی قیمت 62 روپے کلو تھی جو یکم ستمبر کو قیمت 97 روپے کلو ہوگئی۔
یکم اگست کو ڈھائی نمبر آٹا 76 روپے کلو تھا جو آج 99 روپے کا ہوگیا ہے، اسی طرح فائن آٹا 79 روپے کلو تھا جو آج 108 روپے کا ہوگیا ہے۔
فلور ملز ایسوسی ایشن سندھ کے مطابق مقامی مارکیٹ میں گندم کی قیمت 96 روپے عالمی مارکیٹ میں یہ قیمت 85 روپے ہے، سندھ حکومت اگلے ہفتے گندم ریلیز کرتی ہے تو بازار میں گندم کی قیمتیں کم ہو سکتی ہے۔
جنید عزیز نے مزید کہا کہ حکومت کو رواں سال کم سے کم 15 لاکھ ٹن گندم امپورٹ کرنی پڑے گی