پاکستان میں عیدالاضحیٰ کے موقع پر اس سال قربانی کے جانوروں کی تقریباً 75 لاکھ کھالیں جمع ہونے کا تخمینہ لگایا گیا ہے، جن سے 8.7 ارب روپے کی معاشی سرگرمی پیدا ہونے کی توقع ہے۔
عرب میڈیا کی رپورٹس کے مطابق گزشتہ ایک دہائی کے دوران پاکستان میں قربانی کے جانوروں کی تعداد میں 17 فیصد اضافہ ریکارڈ کیا گیا ہے۔ رواں سال تقریباً 28 لاکھ گائے اور بیل، 43 لاکھ بکرے، 5 لاکھ بھیڑیں اور 30 ہزار اونٹوں کی کھالیں حاصل ہونے کا امکان ظاہر کیا جا رہا ہے۔
رپورٹس میں بتایا گیا ہے کہ گزشتہ 9 برسوں کے دوران ملکی چمڑے کی صنعت خام کھالوں کی فروخت سے آگے بڑھ کر ویلیو ایڈڈ اور تیار شدہ مصنوعات کی تیاری کی جانب منتقل ہوئی ہے۔ اس پیش رفت کے نتیجے میں چمڑے سے تیار مصنوعات کی پاکستانی برآمدات کا حجم بڑھ کر 694.20 ملین ڈالر تک پہنچ چکا ہے۔
