اسلام آباد: قومی اسمبلی سیکرٹریٹ نے اخراجات میں کمی کے لیے فوری طور پر اضافی کفایت شعاری اقدامات نافذ کردیے ہیں۔
اعلامیے کے مطابق قومی اسمبلی سیکرٹریٹ کے 50 فیصد ملازمین دفاتر جبکہ 50 فیصد ملازمین گھر سے کام کریں گے۔ گھر سے کام کرنے والے ملازمین کے لیے ٹیلی فون، ای میل اور واٹس ایپ پر دستیابی لازمی قرار دی گئی ہے، جبکہ ضرورت پڑنے پر انہیں ایک گھنٹے کے نوٹس پر دفتر پہنچنا ہوگا۔
اعلامیے میں کہا گیا ہے کہ گھر سے کام کرنے والے 50 فیصد ملازمین ڈیلی الاؤنس اور اوور ٹائم چارجز کے حقدار نہیں ہوں گے۔
کفایت شعاری اقدامات کے تحت سرکاری گاڑیوں کے لیے ایندھن کی فراہمی میں 50 فیصد کمی کردی گئی ہے، جس کا اطلاق تین ماہ تک ہوگا۔ اس دوران نئی سرکاری گاڑیوں کی خریداری پر بھی مکمل پابندی عائد کردی گئی ہے۔
قومی اسمبلی سیکرٹریٹ میں پائیدار اشیا کی خریداری پر پابندی ہوگی، تاہم آئی ٹی آلات اس پابندی سے مستثنیٰ رہیں گے۔
اعلامیے کے مطابق تین ماہ کے لیے غیر ملکی دوروں اور سرکاری سفری اخراجات پر مکمل پابندی ہوگی، جبکہ بین الاقوامی ترقیاتی شراکت داروں کی اسکالرشپس اور مخصوص تربیتی پروگرامز اس پابندی سے مستثنیٰ ہوں گے۔
اس کے علاوہ غیر ملکی وفود کے علاوہ سرکاری عشائیوں، حکومت کے زیرِ انتظام سیمینارز، تربیتی پروگرامز اور کانفرنسز کے انعقاد پر بھی پابندی عائد کردی گئی ہے۔
ناگزیر سرکاری تقریبات کے لیے آڈیٹوریم، کمیٹی رومز اور دیگر سرکاری سہولیات استعمال کرنے کی ہدایت کی گئی ہے۔
اخراجات میں مزید کمی کے لیے قومی اسمبلی سیکرٹریٹ میں پیپر لیس ورکنگ ماحول اپنانے کا فیصلہ بھی کیا گیا ہے۔
اعلامیے کے مطابق یہ تمام اضافی کفایت شعاری اقدامات فوری طور پر نافذ العمل ہوں گے
