اسلام آباد: بانی پی ٹی آئی اور بشریٰ بی بی سے جیل میں وکلاء کی ملاقات کے بعد بشریٰ بی بی کی صحت سے متعلق اہم پیش رفت سامنے آئی ہے، ان کی آنکھ کے سنگین مسئلے کے پیش نظر فوری اسپتال منتقلی کے لیے اسلام آباد ہائیکورٹ میں درخواست دائر کردی گئی۔
بشریٰ بی بی نے سینئر وکلاء سردار لطیف کھوسہ اور بیرسٹر سلمان صفدر کے ذریعے عدالت سے رجوع کیا ہے۔ درخواست میں استدعا کی گئی ہے کہ ان کا مکمل طبی ریکارڈ عدالت میں پیش کرنے کا حکم دیا جائے اور فوری طبی معائنے سمیت سرجری کے لیے ضروری سہولیات فراہم کی جائیں۔
درخواست گزار کے مطابق 10 نومبر کو جیل میں ہونے والی ملاقات کے دوران بانی پی ٹی آئی نے بشریٰ بی بی کی صحت کی سنگینی سے آگاہ کیا تھا، جبکہ 15 نومبر کو بشریٰ بی بی نے خود بھی ممکنہ آنکھ کی سرجری سے متعلق بتایا تھا۔
درخواست میں مؤقف اختیار کیا گیا ہے کہ بشریٰ بی بی کو دیکھنے میں شدید دشواری اور آنکھ میں تکلیف کا سامنا ہے۔ شکایت کے سات سے آٹھ روز بعد جیل میں ڈاکٹر نے ان کا طبی معائنہ کیا۔
بشریٰ بی بی کے بقول ڈاکٹر نے انہیں بتایا کہ آنکھ کی انتہائی پیچیدہ سرجری کی ضرورت پیش آسکتی ہے، جس کے نتیجے میں بینائی متاثر ہونے کا خدشہ بھی موجود ہے۔
درخواست میں عدالت سے استدعا کی گئی ہے کہ بشریٰ بی بی کو فوری طور پر کسی مستند اور خصوصی طبی سہولیات کے حامل اسپتال منتقل کرنے کا حکم دیا جائے تاکہ انہیں بروقت علاج اور ضروری طبی نگہداشت فراہم کی جاسکے۔









