کراچی کے علاقے ملیر میں ہیوی ٹریفک ایک بار پھر جان لیوا ثابت ہوئی، جہاں تیز رفتار ٹریلر کی موٹرسائیکل کو ٹکر سے ایک شخص جاں بحق جبکہ دوسرا شدید زخمی ہوگیا۔ حادثہ رضا موبائل مارکیٹ کے قریب پیش آیا۔
ریسکیو ذرائع کے مطابق اطلاع ملتے ہی امدادی ٹیمیں موقع پر پہنچ گئیں اور جاں بحق ہونے والے شخص کی لاش اور زخمی کو فوری طور پر جناح اسپتال منتقل کر دیا گیا۔
پولیس نے واقعے کی تحقیقات شروع کر دی ہیں، تاہم شہر میں ہیوی ٹریفک کی بے ہنگم آمد و رفت ایک بار پھر خونی حادثے کا سبب بن گئی ہے۔
یاد رہے کہ گزشتہ روز بھی شہر میں دو مختلف ٹریفک حادثات میں ٹریلر اور ڈمپر کی ٹکر سے دو موٹر سائیکل سوار نوجوان جان کی بازی ہار گئے تھے۔
ریسکیو ذرائع کے مطابق رواں سال کراچی میں ٹریفک حادثات کے دوران 312 افراد جاں بحق جبکہ 3275 زخمی ہو چکے ہیں۔ ذرائع کا کہنا ہے کہ رواں سال ٹریلر کی ٹکر سے 48، واٹر ٹینکرز کی ٹکر سے 31، بس کی ٹکر سے 12 اور ڈمپر کی ٹکر سے 5 افراد جان سے گئے، جبکہ مجموعی طور پر ہیوی گاڑیوں کے حادثات میں 107 افراد جاں بحق ہوئے۔
