چترال: دنیا کے بلند ترین پولو گراؤنڈ پر بادشاہوں کے کھیل پولو فیسٹیول کا رنگا رنگ آغاز ہو گیا، جس میں ملک بھر سمیت دنیا کے مختلف ممالک سے آئے سیاحوں نے بھی بھرپور شرکت کی۔
تفصیلات کے مطابق تین روزہ پولو فیسٹیول کی افتتاحی تقریب میں گورنر خیبرپختونخوا فیصل کریم کنڈی نے بطور مہمانِ خصوصی شرکت کی۔ فیسٹیول کے دوران چترال اور گلگت بلتستان کی ٹیموں کے درمیان دلچسپ اور سنسنی خیز مقابلے دیکھنے کو ملے۔
اس موقع پر گورنر خیبرپختونخوا فیصل کریم کنڈی نے کہا کہ صوبے میں سیاحت کا فروغ حکومت کی اولین ترجیح ہے۔ انہوں نے کہا کہ سڑکوں اور دیگر بنیادی سہولیات کی بہتری کے لیے وفاقی حکومت اور نیشنل ہائی وے اتھارٹی (این ایچ اے) کے ساتھ اجلاس کیے جائیں گے تاکہ سیاحوں کو بہتر سہولیات فراہم کی جا سکیں۔
پولو فیسٹیول نہ صرف مقامی ثقافت اور روایات کو اجاگر کرتا ہے بلکہ ملکی اور غیر ملکی سیاحوں کو بھی اپنی جانب متوجہ کرنے کا اہم ذریعہ سمجھا جاتا ہے۔
