اسلام آباد: مشرق وسطیٰ میں جاری صورتحال کے باعث پاکستان سے بین الاقوامی فضائی آپریشن شدید متاثر ہوا ہے اور مختلف ایئرپورٹس سے درجنوں پروازیں منسوخ کی گئی ہیں۔
ذرائع کے مطابق گزشتہ 48 گھنٹوں کے دوران ملک کے بین الاقوامی ایئرپورٹس سے مشرق وسطیٰ کے مختلف ممالک کے لیے مجموعی طور پر 84 پروازیں منسوخ ہوئیں۔ کراچی ایئرپورٹ سے دوحہ، کویت، بحرین، ایران اور عراق سمیت 22 پروازیں منسوخ ہوئیں، جبکہ اسلام آباد ایئرپورٹ سے دبئی، دوحہ، بحرین، کویت اور مسقط کی 10 پروازیں متاثر ہوئیں۔ لاہور ایئرپورٹ سے کویت، دوحہ، بحرین اور ابوظہبی کے لیے 14 پروازیں منسوخ ہوئیں۔ پشاور ایئرپورٹ پر دوحہ، شارجہ، راس الخیمہ، ایران، عراق، دبئی اور ابوظہبی کی 24 پروازیں منسوخ کی گئیں جبکہ ملتان اور سیالکوٹ سے بالترتیب 6 اور 10 پروازیں منسوخ ہوئیں۔
ایئرپورٹس حکام نے مسافروں سے اپیل کی ہے کہ وہ سفر سے قبل اپنی پرواز کی تصدیق کریں اور ایئرلائنز کی جانب سے فراہم کردہ اپ ڈیٹس پر نظر رکھیں۔
