ایزی پیسہ ڈیجیٹل بینک نے سال 2025 کی پہلی ششماہی میں 3.64 ارب روپے کا پری ٹیکس منافع حاصل کیا، جو گزشتہ سال کے اسی عرصے کے مقابلے میں 39.4 فیصد زیادہ ہے۔ مالیاتی نتائج کی منظوری بینک کے بورڈ آف ڈائریکٹرز نے 30 جون 2025 کو ختم ہونے والی مدت کے لیے منظوری دے دی۔
رہنما نیوز کی رپورٹ کے مطابق یہ کارکردگی زیادہ تر ڈیجیٹل قرضہ جات کی فراہمی، مارک اپ آمدن میں اضافے اور پیمنٹس سے حاصل ہونے والی فیسوں کی مضبوط آمدن کے باعث ممکن ہوئی، باوجود اس کے کہ اسٹیٹ بینک کا ڈسکاؤنٹ ریٹ کم ہو کر 11 فیصد پر آگیا۔
اگرچہ آپریٹنگ اخراجات میں 9.6 فیصد اضافہ ہوا، لیکن معاوضوں میں کمی کی بدولت لاگت سے آمدن کا تناسب 80.5 فیصد سے کم ہوکر 66.9 فیصد تک آ گیا، جو آپریشنز میں بہتری کا اشارہ ہے۔
ایزی پیسہ ڈیجیٹل بینک کے صدر و سی ای او، جہانزیب خان نے کہا ”سال 2025 کی پہلی ششماہی میں ہماری شاندار کارکردگی اس بات کا ثبوت ہے کہ ہم پاکستان میں ڈیجیٹل بینکاری کو جدید خطوط پر استوار کرنے کے لیے پرعزم ہیں۔ ہم صارفین کو آسان اور موثر مالی سہولیات فراہم کر رہے ہیں اور ہمارا سفر جاری ہے۔“
ایزی پیسہ، جو ملک کا پہلا کمرشل ڈیجیٹل بینک ہے اور 55 ملین سے زائد رجسٹرڈ صارفین رکھتا ہے، اسٹیٹ بینک آف پاکستان کے وژن کے مطابق ایک شمولیتی، کیش لیس معیشت کے فروغ کے لیے کوشاں ہے۔
