تہران: ایران نے امریکا کو خبردار کیا ہے کہ وہ کسی ممکنہ امریکی حملے کا انتظار نہیں کرے گا بلکہ اپنی سلامتی کے تحفظ کے لیے کسی بھی کارروائی کا جواب دینے کا فیصلہ خود کرے گا۔
ایرانی نائب وزیر خارجہ کاظم غریب آبادی نے سرکاری خبر رساں ادارے ارنا کو انٹرویو دیتے ہوئے الزام عائد کیا کہ امریکا سفارتی مذاکرات کو ایران کے خلاف نئی فوجی کارروائی کی تیاری کے لیے وقت حاصل کرنے کی غرض سے استعمال کرسکتا ہے۔
ان کا بیان ایسے وقت میں سامنے آیا ہے جب مشرقِ وسطیٰ میں امریکی فوجی موجودگی میں اضافے اور ایران امریکا سفارتی مذاکرات متاثر ہونے کے خدشات بڑھ رہے ہیں۔
رپورٹ کے مطابق امریکی طیارہ بردار بحری جہاز یو ایس ایس تھیوڈور روزویلٹ کا اسٹرائیک گروپ بھی مشرقِ وسطیٰ پہنچ گیا ہے، جبکہ دو دیگر امریکی طیارہ بردار بحری جہاز پہلے ہی امریکی سینٹرل کمانڈ کے زیر انتظام خطے میں موجود ہیں۔
کاظم غریب آبادی نے کہا کہ ایران اپنی سلامتی کے معاملے پر کوئی سمجھوتہ نہیں کرے گا اور ممکنہ حملے کے جواب کے لیے پیشگی اقدامات کرنے کا حق رکھتا ہے۔
ایرانی نائب وزیر خارجہ نے مزید کہا کہ ایران کی جوہری تنصیبات تک عالمی جوہری توانائی ایجنسی (آئی اے ای اے) کے معائنہ کاروں کو اس وقت تک رسائی نہیں دی جائے گی جب تک ایرانی شرائط پوری نہیں ہوتیں اور جنگ کا مستقل خاتمہ نہیں ہوجاتا۔
ان کا کہنا تھا کہ امریکا کو پہلے قابلِ اعتماد ضمانتیں فراہم کرنا ہوں گی۔ انہوں نے الزام لگایا کہ گزشتہ ڈیڑھ سال کے دوران امریکا کم از کم تین مرتبہ اپنے وعدوں اور مؤقف سے پیچھے ہٹ چکا ہے۔









