Light
Dark

ترمیم نے ملک کو تباہ کردیا، نئے صوبے سیاسی جماعتوں کی خواہش نہیں، ملک کی ضرورت ہیں: مصطفیٰ کمال

وفاقی وزیر صحت مصطفیٰ کمال نے 18ویں آئینی ترمیم پر تنقید کرتے ہوئے کہا ہے کہ اس ترمیم نے ملک کو تباہ و برباد کردیا، جبکہ نئے صوبوں کا قیام کسی سیاسی جماعت کی خواہش نہیں بلکہ پاکستان کی ضرورت ہے۔

مصطفیٰ کمال کا کہنا تھا کہ ریاستی امور چلانے والوں کو بھی احساس ہوچکا ہے کہ موجودہ نظام بہتر نتائج دینے میں ناکام ہے۔ ان کے خیال میں مستقبل میں ملک میں نئے صوبے قائم ہوں گے۔

انہوں نے کہا کہ عوام کی رائے سب سے زیادہ اہمیت رکھتی ہے، تاہم اس وقت نئے صوبوں سے متعلق سامنے آنے والی باتیں محض تجزیے ہیں۔

وفاقی وزیر نے پیپلزپارٹی کو مخاطب کرتے ہوئے کہا کہ اگر جماعت کو اپنی کارکردگی پر اعتماد ہے تو ملک میں دس صوبے بننے سے بھی اسے کوئی فرق نہیں پڑنا چاہیے۔ پیپلزپارٹی کو حالات کی نزاکت سمجھنے کی ضرورت ہے۔

مصطفیٰ کمال نے پاکستان تحریک انصاف کو بھی مشورہ دیا کہ اسے ریاستی امور میں غیر مشروط طور پر شامل ہونا چاہیے۔ ان کا کہنا تھا کہ محسوس ہوتا ہے کہ پاکستان اور عوام کی سوچ تبدیل ہو رہی ہے۔

کراچی کے مسائل پر بات کرتے ہوئے وفاقی وزیر نے کہا کہ دنیا چاند پر پہنچ رہی ہے، جبکہ کراچی میں بچے گٹروں میں گر کر جان سے ہاتھ دھو رہے ہیں۔

Leave a Reply

Your email address will not be published. Required fields are marked *