اسلام آباد ہائیکورٹ نے وفاقی دارالحکومت میں بلدیاتی انتخابات سے متعلق الیکشن کمیشن کا 21 اکتوبر کو جاری کردہ نوٹیفکیشن معطل کرتے ہوئے انتخابی شیڈول پر عملدرآمد روک دیا ہے۔
جسٹس عمیر مجید ملک نے بلدیاتی انتخابات رکوانے سے متعلق درخواست پر سماعت کے بعد حکم امتناع جاری کیا اور الیکشن کمیشن سمیت دیگر فریقین کو نوٹس جاری کرتے ہوئے 26 نومبر تک جواب طلب کرلیا۔
عدالت کی جانب سے جاری تحریری حکم نامے میں انتخابی شیڈول معطل کرنے کی درخواست منظور کرنے کا ذکر کیا گیا ہے، جس کے نتیجے میں اسلام آباد میں بلدیاتی انتخابات کا شیڈول 26 نومبر تک معطل رہے گا۔
درخواست گزار کے وکیل کے مطابق الیکشن کمیشن قانونی طور پر منصفانہ، آزادانہ اور شفاف انتخابات کرانے کا پابند ہے۔
واضح رہے کہ شہری امجد علی نے وکیل عادل عزیز قاضی کے ذریعے اسلام آباد ہائیکورٹ سے رجوع کرتے ہوئے بلدیاتی انتخابات کا شیڈول معطل کرنے کی استدعا کی تھی۔
