وفاقی وزیر توانائی (پیٹرولیم ڈویژن) علی پرویز ملک نے کہا ہے کہ پاکستان کا مقصد صرف کان کنی کے منصوبے شروع کرنا نہیں بلکہ معدنیات کی پراسیسنگ، ریفائننگ، متعلقہ صنعتوں کے فروغ اور جدید ٹیکنالوجی کی منتقلی کے ذریعے ایک مضبوط، مسابقتی اور پائیدار معدنی صنعت قائم کرنا ہے۔
پاکستان منرلز انویسٹمنٹ فورم 2026 کے دوسرے روز استقبالیہ خطاب کرتے ہوئے وفاقی وزیر نے کہا کہ حکومت معدنی شعبے میں سرمایہ کاری کے فروغ کے لیے کان کنی کے منصوبوں کو بجلی، پانی، سڑکوں، ریلوے اور عالمی منڈیوں تک رسائی کی سہولتوں سے منسلک کر رہی ہے۔
انہوں نے بتایا کہ روہڑی سے نوکُنڈی تک ریلوے کوریڈور کی مجوزہ اپ گریڈیشن، پورٹ قاسم سے رابطوں اور ریکوڈک کے اطراف بنیادی ڈھانچے کی تعمیر پاکستان کے معدنی وسائل سے مالا مال علاقوں کو عالمی منڈیوں سے جوڑنے کے اہم منصوبے ہیں۔
علی پرویز ملک کا کہنا تھا کہ پاکستان معدنی وسائل کو خام شکل میں برآمد کرنے کے بجائے ملک میں ان کی پراسیسنگ، ریفائننگ اور تیار مصنوعات کی تیاری کی صلاحیت پیدا کرنا چاہتا ہے تاکہ عالمی ویلیو چین میں پاکستان کی شمولیت بڑھائی جاسکے۔
وفاقی وزیر نے مزید کہا کہ معدنی شعبے کی ترقی کے ثمرات مقامی آبادی تک پہنچانا حکومت کی ترجیحات میں شامل ہے۔ اس مقصد کے لیے پاکستانی نوجوانوں، بالخصوص خواتین کو تکنیکی تربیت، روزگار اور کاروباری مواقع فراہم کیے جائیں گے۔
انہوں نے زور دیا کہ کان کنی کے منصوبوں میں ماحولیاتی تحفظ، حفاظتی معیارات اور مقامی آبادی کے ساتھ شفاف رابطے کو بنیادی اہمیت حاصل ہونی چاہیے، کیونکہ مقامی لوگوں کا اعتماد حاصل کرنے والے منصوبے ہی طویل مدت تک کامیابی سے جاری رہ سکتے ہیں۔
فورم میں وزیراعظم شہباز شریف اور فیلڈ مارشل عاصم منیر سمیت اعلیٰ حکومتی شخصیات بھی شریک ہیں۔ اس موقع پر وفاقی وزیر نے بیرک، ایوانہو، من میٹلز اور دیگر عالمی سرمایہ کاروں کو پاکستان میں طویل المدتی سرمایہ کاری کی دعوت دیتے ہوئے یقین دہانی کرائی کہ حکومت منصوبوں پر پیش رفت کے لیے تکنیکی مشاورت، ملاقاتوں، سائٹ وزٹس اور منصوبوں کے جائزے کا باقاعدہ طریقہ کار فراہم کرے گی۔
انہوں نے کہا کہ حکومت محض سرمایہ کاری کی دعوت تک محدود نہیں رہنا چاہتی بلکہ فورم کے اختتام کے بعد عملی اقدامات کے ذریعے عالمی سرمایہ کاروں کا اعتماد حاصل کرنے کے لیے پرعزم ہے۔
