Light
Dark

معاہدے کے بنیادی نکات پر اتفاق تھا، سہیل آفریدی کے مطالبات سے مذاکرات ناکام ہوئے : طلال چوہدری

وزیر مملکت برائے داخلہ طلال چوہدری نے دعویٰ کیا ہے کہ حکومت اور اپوزیشن کے درمیان معاہدے کے بنیادی نکات پر اتفاق رائے ہو چکا تھا، تاہم دستخط سے کچھ دیر قبل وزیراعلیٰ خیبر پختونخوا سہیل آفریدی کے مطالبات کے باعث مذاکرات کامیاب نہ ہو سکے۔

اسلام آباد میں پریس کانفرنس کرتے ہوئے طلال چوہدری نے الزام عائد کیا کہ وزیراعلیٰ خیبر پختونخوا نے جان بوجھ کر مذاکرات کو کامیاب نہیں ہونے دیا۔ ان کا کہنا تھا کہ معاہدے کے اہم نکات طے پا چکے تھے اور انہیں یقین تھا کہ ملک میں ’’میثاقِ جمہوریت 2‘‘ کی بنیاد رکھی جا رہی ہے، تاہم آخری مرحلے میں سامنے آنے والے مطالبات نے معاملہ ختم کردیا۔

ایک سوال کے جواب میں وزیر مملکت نے کہا کہ اپوزیشن ارکان حقائق چھپا رہے ہیں۔ ان کا کہنا تھا کہ نیشنل ایکشن پلان پی ٹی آئی کی قیادت نے منظور کیا تھا، اس لیے یہ سوال اٹھتا ہے کہ کیا وہ منصوبہ پختونوں یا خیبر پختونخوا کے خلاف تھا؟

طلال چوہدری نے خیبر پختونخوا میں سکیورٹی صورتحال پر بھی بات کرتے ہوئے کہا کہ صوبے میں جنازے، شادیاں، اجتماعات اور سیاسی سرگرمیاں دہشت گرد حملوں سے محفوظ نہیں۔ انہوں نے سوال اٹھایا کہ انہی علاقوں میں پی ٹی آئی کے لوگ گروپوں کی صورت میں موجود رہتے ہیں لیکن ان پر حملے کیوں نہیں ہوتے، ’’کچھ تو ہے نا‘‘۔