اسلام آباد: وزارت داخلہ کے نام پر گاڑیوں کے کالے شیشوں کے جعلی این او سیز اور اجازت نامے جاری کیے جانے کا انکشاف ہوا ہے، جبکہ نئی پالیسی کا مسودہ بھی تیار کرلیا گیا ہے۔
ذرائع وزارت داخلہ کے مطابق چیف سیکرٹریز اور آئی جیز کو جعلی اجازت نامے جاری کرنے والے افراد کے خلاف کارروائی کی ہدایت کردی گئی ہے۔
ذرائع کا کہنا ہے کہ گاڑیوں کے ٹنٹڈ شیشوں کے اجازت ناموں پر پابندی 31 مارچ 2013 سے عائد ہے اور اس کے بعد ٹنٹڈ شیشوں کے استعمال کے لیے وزارت داخلہ کی جانب سے کوئی این او سی جاری نہیں کیا گیا۔
سینیٹ کمیٹی کی ہدایت پر ٹنٹڈ شیشوں کے استعمال سے متعلق نئی پالیسی کا مسودہ تیار کیا گیا ہے، جس میں طبی اور سیکیورٹی وجوہات کی بنیاد پر اجازت دینے کی پالیسی بھی زیر غور ہے۔
ذرائع کے مطابق نظرثانی شدہ مسودہ متعلقہ اسٹیک ہولڈرز کو بھجوا کر تجاویز طلب کرلی گئی ہیں، آراء موصول ہونے کے بعد پالیسی کو حتمی شکل دی جائے گی۔
