اسلام آباد: چیئرمین پی ٹی آئی بیرسٹر گوہر علی نے کہا ہے کہ عمران خان کی صحت پر کبھی سیاست نہیں کریں گے اور عدالتی حکم پر عملدرآمد ہونے کی صورت میں حکومت کے ساتھ بات چیت آگے بڑھے گی۔ پارلیمنٹ ہاؤس میں میڈیا سے گفتگو کرتے ہوئے انہوں نے کہا کہ بانی پی ٹی آئی کی صحت سب سے اہم ہے اور طبی رپورٹس کو ذاتی معاملات کے لیے استعمال نہیں کیا جائے گا۔
بیرسٹر گوہر نے بشریٰ بی بی کو بھی اسپتال منتقل کرکے طبی سہولیات فراہم کرنے کا مطالبہ کیا اور کہا کہ عدالتی احکامات پر عملدرآمد سے ملک میں سیاسی درجہ حرارت کم ہوسکتا ہے۔ ان کا کہنا تھا کہ حکومت کو سیاسی اختلافات کا حل بات چیت کے ذریعے نکالنا چاہیے اور آگے بڑھنے کی ابتدا عدالتی حکم پر عملدرآمد سے ہونی چاہیے۔
انہوں نے کہا کہ فوج، پولیس اور رینجرز کی حفاظت ہر پاکستانی کی اولین ترجیح ہے، جبکہ دہشتگردی جہاں بھی ہو قابل مذمت ہے۔
