ایران کے اعلیٰ رہنما کے مشیر محسن رضائی نے کہا ہے کہ جب تک ایران کے مکمل حقوق تسلیم نہیں کیے جاتے، آبنائے ہرمز کو نہیں چھوڑا جائے گا۔ ایرانی ذرائع ابلاغ سے گفتگو کرتے ہوئے انہوں نے دعویٰ کیا کہ امریکا مسلسل کشیدگی سے خوف زدہ ہے جبکہ ایران طویل جنگ کے لیے مکمل طور پر تیار ہے۔
محسن رضائی نے مزید کہا کہ ایرانی لانچر امریکی بحری جہازوں کو نشانہ بنانے کی صلاحیت رکھتے ہیں اور اگر ایران کی بحری طاقت کمزور ہو چکی ہوتی تو امریکا کو آبنائے ہرمز سے گزرنے میں ہچکچاہٹ نہ ہوتی۔
ان کے اس بیان کے بعد خطے میں کشیدگی مزید بڑھنے کا خدشہ ظاہر کیا جا رہا ہے، جبکہ ماہرین کا کہنا ہے کہ آبنائے ہرمز جیسے اہم بحری راستے پر بڑھتی ہوئی تناؤ عالمی تجارت اور توانائی کی ترسیل کو متاثر کر سکتی ہے۔
