وزیر مملکت برائے خزانہ بلال اظہر کیانی نے تنخواہ دار طبقے کے لیے جلد ریلیف دینے کی نوید سنا دی ہے
انہوں نے کہا کہ تنخواہ دار طبقے پر ٹیکسوں کا بوجھ زیادہ ہے، حکومت مالی گنجائش کو مدنظر رکھتے ہوئے ریلیف دینے کی کوشش کرے گی۔
بلال اظہر کیانی نے کہا کہ منی بجٹ لانا یا ہنگامی ٹیکس اقدامات اٹھانا ضروری نہیں، آئی ایم ایف سے قرض کی قسط کا اجرا پاکستانی معیشت پر اعتماد کا اظہار ہے، عالمی ریٹنگ ایجنسیوں کی پاکستانی معیشت کے بارے میں رپورٹس مثبت ہیں۔
وزیر مملکت خزانہ کا کہنا تھا کہ پاکستان میں اوسط مہنگائی 24 فیصد سے کم ہو کر 5 فیصد تک آگئی، عوام کی قوت خرید میں اضافےکی گنجائش ہے ، وزیراعظم شہباز شریف نجی شعبے کی مشاورت سے آگے بڑھ رہے ہیں ، گزشتہ ڈیرھ سال میں معاشی استحکام اور مالی ڈسپلن پیدا کیا گیا۔
وزیر مملکت خزانہ نے کہا کہ پاکستان کے زرمبادلہ ذخائر کو مستحکم کیا گیا ہے، معاشی اصلاحات کا مقصد عوام کو ریلیف اور فوائد پہنچانا ہے، معاشی استحکام نہ آتا تو سری لنکا کی طرح کے خطرات درپیش تھے، سرکاری اداروں کی نجکاری، ٹیرف اصلاحات ناگزیر ہیں۔
