اسلام آباد: ملک بھر میں میٹرک کی سطح پر دو نئے تعلیمی گروپس متعارف کرانے کی تجویز سامنے آ گئی ہے، جن میں ٹیکنیکل اور زراعت کے مضامین شامل کرنے پر غور کیا جا رہا ہے۔
میٹرک کی سطح پر نئے تعلیمی گروپس سے متعلق انٹر بورڈ کوآرڈینیشن کمیشن کا مشاورتی اجلاس طلب کر لیا گیا ہے، جس میں مضامین کی گروہ بندی، اعلیٰ تعلیم کے متبادل راستوں اور تعلیمی اصلاحات پر غور کیا جائے گا۔
آئی بی سی سی کا اجلاس 23 دسمبر کو اسلام آباد میں منعقد ہوگا، جس میں انٹرمیڈیٹ میں پری میڈیکل اور پری انجینئرنگ گروپس میں داخلے کی اہلیت کا بھی جائزہ لیا جائے گا۔
اجلاس کے دوران میٹرک کی سطح پر متبادل مضامین کی مساوات، غیر ملکی تعلیمی اسناد کی مساوات، جنرل اور ووکیشنل ٹریننگ سے متعلق امور پر بھی مشاورت کی جائے گی۔
اس کے علاوہ میٹرک ٹیکنیکل اور زراعت کے مضامین پڑھنے والے طلبہ کے لیے میڈیکل اور انجینئرنگ میں داخلوں کے امکانات پر بھی غور کیا جائے گا۔ تعلیمی اصلاحات کے لیے قومی ورکنگ گروپ قائم کرنے کی تجویز بھی اجلاس کے ایجنڈے میں شامل ہے۔
