غیر قانونی افغان باشندوں کی واپسی لازمی ہے جب کہ فیک نیوز پھیلانے والوں کیخلاف کارروائی ہوگی۔
میڈیا سے گفتگو کے دوران محسن نقوی نے اس بات پر زور دیا کہ آزادیٔ اظہار کو جھوٹی یا گمراہ کن خبروں کے لائسنس کے طور پر استعمال نہیں کیا جاسکتا، کیونکہ اس رویے نے نہ صرف معاشرے میں غلط فہمیاں پیدا کیں بلکہ قومی سلامتی کے معاملات کو بھی نقصان پہنچایا ہے۔
ان کا کہنا تھا کہ فیک نیوز کا رجحان اس حد تک بڑھ چکا ہے کہ سوشل میڈیا پر گردش کرنے والی بیشتر اطلاعات حقیقت سے دور ہوتی ہیں، لیکن عام لوگ انہیں سچ سمجھ کر انتشار کا شکار ہو جاتے ہیں۔
محسن نقوی نے مزید کہا کہ جو افغان باشندے واپس بھیجے جانے کے بعد دوبارہ پاکستان آئے، انہیں قانون کے مطابق سخت کارروائی کا سامنا کرنا پڑے گا۔ افغان کیمپس کے خاتمے کا عمل بھی شروع ہوچکا ہے۔
انہوں نے بتایا کہ بیرون ملک بیٹھ کر پاکستان کے خلاف بیانات دینے والے عناصر کو بھی قانون کے سامنے لایا جائے گا۔
انہوں نے واضح کیا کہ ملک کے تین صوبوں میں کارروائیاں جاری ہیں اور نتائج بھی حاصل ہورہے ہیں۔
