آپریشن کے دوران بھارتی اسپانسرڈ خوارج ہلاک

کرم : سیکیورٹی فورسز نے ضلع کرم میں آپریشن کے دوران 23 بھارتی اسپانسرڈ خوارج ہلاک کردیے۔
تفصیلات کے مطابق آئی ایس پی آر کی جانب سے بیان میں کہا گیا کہ خیبر پختونخوا کے ضلع کُرّم میں سیکیورٹی فورسز نے دو الگ الگ انٹیلی جنس بیسڈ کارروائیوں کے دوران بھارتی سرپرستی میں سرگرم فتنہ ’’الخوارج‘‘ سے تعلق رکھنے والے 23 دہشتگردوں کو ہلاک کر دیا۔
آئی ایس پی آر نے بتایا کہ 19 نومبر کو موصول ہونے والی مصدقہ خفیہ اطلاعات پر سیکیورٹی فورسز نے کرّم کے ایک علاقے میں ٹارگٹڈ آپریشن کیا۔
کارروائی کے دوران دہشتگردوں کے ٹھکانے کا محاصرہ کیا گیا، اور شدید فائرنگ کے تبادلے میں 12 دہشت گرد مارے گئے۔
ترجمان کا کہنا تھا کہ اسی مقام پر موجود خوارج کے ایک اور گروہ کی موجودگی کی اطلاع ملنے پر دوسرا انٹیلی جنس بیسڈ آپریشن کیا گیا، جس میں مزید 11 دہشت گردوں کو ہلاک کر دیا گیا۔
آئی ایس پی آر کے مطابق تمام ہلاک دہشتگرد بھارتی سرپرستی میں پاکستان میں دہشتگردی کی کارروائیوں میں ملوث تھے۔
کارروائی کے دوران دہشتگردوں کے قبضے سے بھاری مقدار میں اسلحہ اور دیگر مواد بھی برآمد کیا گیا ، علاقے میں سینیٹائزیشن آپریشن جاری ہے تاکہ کسی بھی ممکنہ چھپے ہوئے دہشت گرد کے خاتمے کو یقینی بنایا جا سکے۔
آئی ایس پی آر نے کہا کہ نیشنل ایکشن پلان کے تحت فیڈرل ایپکس کمیٹی سے منظور شدہ ویژن “عزمِ استحکام” کے مطابق ملک بھر میں دہشتگردی کے خلاف آپریشنز پوری رفتار اور تسلسل سے جاری رہیں گے اور سیکیورٹی فورسز غیر ملکی پشت پناہی یافتہ دہشت گردی کے مکمل خاتمے کے لیے پرعزم ہیں۔