شکارپور سے کوئٹہ جانے والی گیس پائپ لائن قریب تباہ

کوئٹہ (15 نومبر 2025): سندھ کے شہر شکارپور سے بلوچستان کے دارالحکومت کوئٹہ جانے والی گیس پائپ لائن مچھ کے قریب تباہ ہوگئی۔
سوئی سدرن گیس کمپنی کے حکام نے واقعے کی تصدیق کرتے ہوئے بتایا کہ شکارپور سے کوئٹہ جانے والی گیس پائپ لائن مچھ کے قریب تباہ ہوئی، 18 انچ قطر کی پائپ لائن سے کوئٹہ کو گیس کی سپلائی منقطع ہوگئی۔
حکام نے بتایا کہ گیس پائپ لائن متاثر ہونے سے مستونگ، پشین اور زیارت کو بھی سپلائی منقطع ہوئی، اس کی مرمت ہونے تک کوئٹہ کو صرف کھانے کے اوقات میں گیس ملے گی۔
تاہم یہ معلوم نہیں ہو سکا کہ واقعہ تخریب کاری کے باعث آیا یا لیکیج کے، اس متعلق تحقیقات کے بعد ہی وجہ سامنے آ سکے گی۔

واضح رہے کہ 13 اگست 2025 کو خیبر پختونخوا کے ضلع لکی مروت میں شرپسندوں نے گیس پائپ لائن دھماکے سے اڑا دی تھی۔ پولیس حکام نے بتایا تھا کہ نامعلوم شرپسندوں نے بھانہ منجیوالہ کی حدود میں پائپ لائن دھماکے سے اڑائی، انہوں نے دھماکا خیز مواد نصب کر رکھا تھا۔
اس سے قبل 16 جولائی 2025 کو لکی مروت کے علاقے وانڈہ امیر کے قریب پنجاب جانے والی گیس پائپ لائن کو دھماکے سے اڑایا گیا تھا جس کے باعث سپلائی معطل ہوگئی تھی۔
پولیس نے واقعے کی تصدیق کرتے ہوئے بتایا تھا کہ آدھی رات کو وانڈہ امیر اور دبک مندرہ خیل برساتی نالے کے قریب ضلع لکی مروت سے پنجاب جانے والی مین ٹرانسمیشن گیس پائپ لائن کو دہشتگردوں نے دھماکا خیز مواد سے اڑایا۔
پولیس حکام کے مطابق دھماکے کے باعث مزکورہ جگہ پر بڑا گڑا بن گیا، پائپ لائن تباہ ہونے سے ضلع سے پنجاب جانے والی گیس کی سپلائی معطل ہوگیا۔