وفاقی آئینی عدالت کے پہلے چیف جسٹس امین الدین کی حلف برداری

اسلام آباد : وفاقی آئینی عدالت کے پہلے چیف جسٹس امین الدین آج اپنے عہدے کا حلف اٹھائیں گے، صدر مملکت آصف علی زرداری چیف جسٹس سے حلف لیں گے۔
تفصیلات کے مطابق اسلام آباد میں نئی قائم ہونے والی وفاقی آئینی عدالت کے پہلے چیف جسٹس کی حلف برداری کی تقریب آج ایوان صدر میں ہوگی۔
جس میں جسٹس امین الدین خان اپنے عہدے کا حلف اٹھائیں گے، صدر مملکت آصف علی زرداری چیف جسٹس سے حلف لیں گے۔
دوسری جانب آئینی عدالت کے دیگر 6 ججز کی حلف برداری کی تقریب اسلام آباد ہائیکورٹ بلڈنگ میں منعقد ہونے کا امکان ہے، جہاں ججز اور ایڈمن بلاک کے درمیان اوپن ایریا میں انتظامات جاری ہیں۔چیف جسٹس امین الدین خان منصب سنبھالنے کے بعد دیگر ججز سے حلف لیں گے۔
گذشتہ روز صدر مملکت نے وزیر اعظم کی ایڈوائس پر جسٹس امین الدین خان کی بطور چیف جسٹس آئینی عدالت تقرری کی منظوری دے دی ہے اور اس حوالے سے باضابطہ نوٹیفکیشن بھی جاری کر دیا گیا ہے۔
جسٹس امین الدین خان تین سال کے لیے وفاقی آئینی عدالت کے سربراہ مقرر کیے گئے ہیں۔ یہ نئی عدالت ملکی آئینی معاملات کے فیصلوں کے لیے ایک اہم پیش رفت قرار دی جا رہی ہے۔