چین کانیا خلائی مشن کامیابی سے روانہ

بیجنگ: چین کانیا خلائی مشن ’شین ژو21‘ کامیابی سے روانہ ہوگیا ، مشن میں چین کے سب سے کم عمر خلاباز سمیت تین خلاباز شامل ہیں۔
تفصیلات کے مطابق چین نے اپنا نیا خلائی مشن ’شین ژو-21‘ کامیابی کے ساتھ خلا میں روانہ کردیا، یہ مشن تیانگونگ خلائی اسٹیشن کے لیے بھیجا گیا ہے۔
چینی میڈیا نے بتایا کہ مشن کو شمال مغربی چین کے جیوچوان سیٹلائٹ لانچ سینٹر سے لانچ کیا گیا۔ یہ 2022 میں تعمیر ہونے والے تیانگونگ خلائی مرکز سے ساتواں مشن ہے۔
مشن میں چین کے سب سے کم عمر خلاباز سمیت تین خلاباز اور چار چوہے شامل ہیں، یہ خلاباز چھ ماہ تک خلا میں قیام کریں گے اور مختلف سائنسی تجربات انجام دیں گے۔
خلائی مشن کی ٹیم میں کمانڈر ژانگ لو کے ساتھ ژانگ ہونگ ژانگ اور وو فی شامل ہیں۔ وو فی 32 سالہ انجینئر، چین کے خلائی پروگرام کی تاریخ میں سب سے کم عمر خلاباز ہیں۔
چینی حکام کے مطابق شین ژو-21 کی کامیاب روانگی چین کے بڑھتے ہوئے خلائی پروگرام کی جانب ایک اور اہم سنگِ میل ہے، اس مشن سے چین کے خلائی تحقیق، انسانی مشنز اور طویل مدتی اسپیس اسٹیشن آپریشنز میں مہارت مزید مضبوط ہوگی۔
چینی حکام نے کہا ہے کہ ملک کا ہدف 2030 تک خلابازوں کو چاند پر اتارنا ہے اور مستقبل میں چاند پر مستقل اڈا قائم کرنا بھی منصوبے میں شامل ہے — یہ سب کچھ امریکہ اور روس کے خلائی پروگراموں کے مقابلے میں چین کی بڑھتی صلاحیت کا ثبوت ہے۔
واضح رہے کہ چین کا تیانگونگ خلائی اسٹیشن بین الاقوامی خلائی اسٹیشن کے متبادل کے طور پر تیزی سے ترقی پا رہا ہے، جہاں چین خلا میں طویل المدتی قیام اور سائنسی تجربات کے شعبے میں نمایاں کامیابیاں حاصل کر رہا ہے۔