کسی کو انتشار کی اجازت نہیں :وزیراعلیٰ پنجاب

لاہور (30 اکتوبر 2025): وزیر اعلیٰ پنجاب مریم نواز کا کہنا ہے کہ صوبے میں امن و امان کی صورتحال کنٹرول میں ہے، کسی کو انتشار کی اجازت نہیں دی جائے گی۔
وزیر اعلیٰ مریم نواز سے اسپیکر پنجاب اسمبلی ملک محمد احمد خان نے ملاقات کی، اس دوران صوبے کی مجموعی سیاسی و انتظامی صورتحال پر تبادلہ خیال کیا گیا جبکہ قانون سازی کے مراحل اور ایوان کی کارروائی سے متعلق تفصیلی گفتگو ہوئی۔
ملاقات میں صوبے بھر میں امن و امان کی صورتحال خراب کرنے والوں سے سختی سے نمٹنے پر اتفاق ہوا۔ مریم نواز کا کہنا تھا کہ انتشار کی اجازت نہیں دی جائے گی۔
اسپیکر اسمبلی ملک محمد احمد خان نے کاروبار میں آسانی کیلیے ’ای بز‘ سہولت متعارف کروانے پر مریم نواز کو خراج تحسین پیش کیا جبکہ امن و امان کی بہتری پر پنجاب کے عوام کی طرف سے ان سے اظہار تشکر کیا۔
ملاقات کے دوران وزیر اعلیٰ اسپیکر کو اسمبلی کے امور پر سب کو ساتھ لے کر چلنے کی روش پر شاباشی دی۔
مریم نواز نے کہا کہ صوبے کی تاریخ میں پہلی بار ہر بڑا پراجیکٹ چھوٹے شہروں سے شروع کر رہے ہیں، صوبے میں کاروبار کا بہترین پوٹینشل موجود ہے سرمایہ کاروں کو فائد اٹھانا چاہیے۔
انہوں نے کہا کہ پنجاب حکومت ملکی اور غیر ملکی سرمایہ کاروں کی ہر ممکن معاونت کرے گی۔
اس پر ملک محمد احمد خان نے کہا کہ پہلی بار ترقیاتی منصوبوں کا مرکز صرف لاہور یا بڑے شہر نہیں بلکہ پنجاب کا ہر پسماندہ علاقہ ہے۔