چین اور امریکا ایک دوسرے کے دوست اور پارٹنر

بوسان (30 اکتوبر 2025): چین کے صدر شی جن پنگ نے کہا ہے کہ چین اور امریکا کو ایک دوسرے کا دوست اور پارٹنر ہونا چاہیے۔
آج جنوبی کوریا کے شہر بوسان میں امریکی صدر ڈونلڈ ٹرمپ اور چینی صدر شی جن پنگ کے درمیان ایک اہم اور تاریخی ملاقات ہوئی ہے، جس میں چینی صدر نے امریکی صدر کو غزہ جنگ بندی کرانے پر خراج تحسین پیش کیا۔
شی جن پنگ نے کہا چین اور امریکا کو ایک دوسرے کا دوست اور پارٹنر ہونا چاہیے، غزہ میں سیز فائر کروانے پر آپ کو خراج تحسین پیش کرتے ہیں۔
امریکی اور چینی صدور کے درمیان ملاقات ایک گھنٹے 40 منٹ جاری رہی، دونوں کے درمیان 6 سال بعد ملاقات ہوئی ہے، ملاقات کے بعد صدر ٹرمپ ایئر فورس ون طیارے میں سوار ہو کر روانہ ہو گئے۔
صدر ٹرمپ نے چینی صدر سے ملاقات کو زبردست قرار دیا، انھوں نے کہا چینی صدر ایک عظیم رہنما ہیں، واشنگٹن اور بیجنگ کے درمیان بہت سے اہم نکات پر اتفاق ہو گیا ہے، چین امریکا سے بڑی مقدار میں سویابین خریدنا شروع کر دے گا۔
انھوں نے کہا نایاب معدنیات کی تجارت کا معاملہ بھی طے پا گیا ہے، اپریل میں چین کا دورہ کروں گا، چین فین ٹینائل کی تیاری میں استعمال کیمیائی اجزا کا امریکا میں داخلہ روکے گا، اور امریکا تمام چینی مصنوعات پر عائد ٹیرف کو کم کر دے گا۔