اقوام متحدہ کےادارے نے فنڈز کی منظوری دیدی

نیویارک/اسلام آباد(29 اکتوبر 2025): اقوام متحدہ کےادارے گرین کلائمیٹ فنڈ نے 25 کروڑ ڈالر فنڈز کی منظوری دیدی۔
ایشین ڈویلپمنٹ بینک (اے ڈی بی) کے اعلامیے میں بتایا گیا ہے کہ گرین کلائمیٹ فنڈ نے پاکستان کیلئے 25کروڑ ڈالر امداد کی منظوری دی ہے، گرین کلائمٹ فنڈ دنیا کا سب سے بڑا ماحولیاتی فنڈ ہے۔
اعلامیے کے مطابق یہ رقم ایشیائی ترقیاتی بینک کے ذریعے برف پگھلنے سے متاثرہ علاقوں پر خرچ ہو گی۔ ایشیائی ترقیاتی بینک کی معاونت سے منصوبےکو مکمل کیا جائے گا اس منصوبے کے تحت گلیشیئرز کے ماحولیاتی اثرات سے نمٹنے کیلئے مدد فراہم کی جائیگی۔
گرین کلائمٹ فنڈ کی جانب سے جاری اعلامیے میں مزید کہا گیا ہے کہ امداد سے سوات میں کسانوں کو زراعت، آبپاشی کی سہولیات فراہم کی جائیں گی۔
ایشیائی ترقیاتی بینک بھی 10 سال کے دوران مزید سرمایہ لگائے گا۔ فنڈز کا مقصد پانی اور زراعت کے نظام کو مضبوط بنانا ہے۔ منصوبے سے ایک کروڑ 30 لاکھ لوگ براہ راست فائدہ اٹھائیں گے، گرین کلائمیٹ فنڈ 2010 میں قائم کیا گیا تھا جس کا مقصد دنیا میں ماحولیاتی تبدیلی کے اثرات کم کرنا ہے۔