وزیراعظم شہباز شریف سعودی عرب کا دورہ کریں گے

ترجمان دفتر خارجہ کا کہنا ہے کہ وزیراعظم شہباز شریف 27 تا 29 اکتوبر سعودی عرب کا دورہ کریں گے۔
دفتر خارجہ کے مطابق سعودی ولی عہد شہزادہ محمد بن سلمان کی دعوت پر وزیراعظم ریاض جائیں گے، ان کے ہمراہ نائب وزیراعظم اسحاق ڈار اور کابینہ کے سینئر ارکان بھی جائیں گے۔
ترجمان کا کہنا ہے کہ وزیراعظم مستقبل سرمایہ کاری کانفرنس کے نویں ایڈیشن میں شرکت کریں گے، کانفرنس کا موضوع  خوشحالی کی کنجی، ترقی کی نئی سرحدوں کا انکشاف ہے، کانفرنس میں عالمی رہنما، سرمایہ کار، پالیسی ساز اور موجد شرکت کریں گے۔
ترجمان دفتر خارجہ کا کہنا ہے کہ موضوعاتی اجلاسوں میں اختراع، پائیداری، اقتصادی شمولیت، جغرافیائی تبدیلیوں پر گفتگو ہوگی، وزیراعظم کا سعودیہ سے تجارت، سرمایہ کاری، توانائی، افرادی وسائل کے شعبوں میں تعاون پر تبادلہ خیال ہوگا، دورےکے دوران علاقائی و عالمی امور پر بھی بات چیت ہوگی۔
ترجمان کا کہنا ہے کہ وزیراعظم دیگر ممالک کے رہنماؤں، بین الاقوامی تنظیموں کے سربراہان سے بھی ملاقاتیں کریں گے، وزیراعظم پاکستان کی سرمایہ کاری کی صلاحیت اور پائیدار ترقی کے وژن کو اجاگر کریں گے۔