کراچی (25 اکتوبر 2025): کراچی کے علاقے ڈیفنس سے چوری کے الزام میں گرفتار گھریلو ملازم کروڑ پتی نکلا، تحقیقات میں حیران کن انکشافات سامنے آ گئے ہیں۔
پولیس حکام کے مطابق 45 ہزار روپے ماہانہ تنخواہ پانے والے ملازم کے کروڑوں کے اثاثے نکل آئے ہیں، اور معلوم ہوا ہے کہ وہ 4 بینک اکاؤنٹس کا مالک بھی ہے۔
پولیس حکام کے مطابق ملزم نے چوری کی رقم سے کراچی کے پوش علاقے میں فلیٹ، ہری پور اور اسلام آباد میں پلاٹس خرید رکھے ہیں، بینک اکاؤنٹس سے ایک کروڑ 86 لاکھ روپے ٹرانزکشن کے ثبوت بھی مل گئے۔
ملزم کی نشان دہی پر برآمد سونے کی مالیت سوا کروڑ روپے کے لگ بھگ ہے، ملزم نے چوری کی رقم سے ایک مسافر وین بھی خریدی ہے جو اسلام آباد سے ہری پور چل رہی ہے، 8 سال کی ملازمت کے دوران ملزم نے معمر جوڑے کے بینک اکاؤنٹس، لاکرز سمیت ہر جگہ تک رسائی حاصل کی، بزرگ جوڑے کو بیرون ملک مقیم بیٹا اور بیٹی ماہانہ بھاری رقم بھیجا کرتے تھے۔
پولیس حکام کا کہنا ہے کہ ملزم کے بینک اکاؤنٹس بلاک کرانے اور ٹرانزیکشنز کی معلومات حاصل کرنے کا فیصلہ کیا گیا ہے، تفتیشی حکام کا کہنا ہے کہ ملزم کو کراچی ڈیفنس کے رہائشی عمر رسیدہ جوڑے نے 8 برس قبل ملازمت پر رکھا تھا، پولیس حکام کے مطابق 4 سال قبل شوہر کا انتقال ہوا تو ملزم معمر خاتون کی دیکھ بھال کرتا رہا، اسی دوران چوری شروع کی
