پولیس افسروں کو توہین عدالت کے نوٹس جاری

راولپنڈی : انسدادِ دہشت گردی عدالت نے بانی پی ٹی آئی کی بہن علیمہ خانم کو گرفتار نہ کرنے پر پولیس افسروں کو توہین عدالت کے نوٹس جاری کردیے۔
تفصیلات کے مطابق انسدادِ دہشت گردی عدالت نے بانی پی ٹی آئی کی بہن علیمہ خانم کو گرفتار نہ کرنے پر پولیس افسران کے خلاف توہینِ عدالت کی کارروائی کا حکم دیتے ہوئے ایس پی اور ڈی ایس پی راولپنڈی کو ذاتی حیثیت میں طلب کر لیا ہے۔
سماعت کے دوران عدالت نے ریمارکس دیے کہ پولیس نے علیمہ خانم کے روپوش ہونے کی بوگس رپورٹ پیش کی، جبکہ وہ گزشتہ روز اڈیالہ جیل کے باہر میڈیا سے گفتگو کر رہی تھیں، پولیس نے جعلی رپورٹ دے کر عدالت کو دھوکہ دیا۔
عدالت نے بانی پی ٹی آئی کی بہن کے ضامن کے ایک لاکھ روپے کے مچلکے ضبط کرنے کا بھی حکم دیا۔
خیال رہے چھبیس نومبر جلاؤ گھیراؤ کیس میں عدالت نے علیمہ خان کے ناقابلِ ضمانت وارنٹ گرفتاری چوتھی بار جاری کئے تھے۔