جگہ جگہ کھلے ہوٹل بار بی کیو عوام کیلیے تفریح طبع اور لذت کام ودہن کا بڑا ذریعہ ہیں تاہم اب ان کیلیے بڑا حکم آ گیا ہے۔
موسم سرما کی آمد آمد ہے اور راتوں میں دھند کا آغاز ہو چلا ہے جب کہ ماحولیاتی آلودگی اس دھند کو اسموگ میں تبدیل کر دیتی ہے، جو عوام الناس کی صحت کے لیے ایک بہت بڑا خطرہ ہے۔
سڑکوں کے کنارے قائم اور رات گئے تک کھلنے والے ہوٹل اور بار بی کیو بھی ماحولیاتی آلودگی میں اپنا حصہ وہاں سے خارج ہونے والے کاربن کے ذریعہ ڈالتے ہیں۔ تاہم اب ایسے تمام ہوٹلز اور بار بی کیو مقامات کے خلاف سخت کارروائی کا حکم جاری کر دیا گیا ہے۔
ڈی جی ماحولیات پنجاب عمران حامد شیخ نے صوبے بھر میں ہوٹلوں اور بار بی کیو مقامات کے خلاف سخت کارروائی کا حکم دیتے ہوئے انتباہ جاری کر دیا ہے۔
ڈی جی ماحولیات کا کہنا ہے کہ ایندھن کے لیے کوئلہ، لکڑی یا چارکول استعمال کرنے والے تمام ریسٹورینٹس اور بار بی کیوز کے خلاف کارروائی ماحولیاتی قوانین کے تحت کارروائی کی جائے گی۔
عمران شیخ کا نے تمام ہوٹل اور بار بی کیو اسٹیشنز کے مالکان کو 15 دن کے اندر سکشن ہوڈز لگانے کا حکم دیتے ہوئے واضح کیا کہ مقررہ مدت میں سکشن سسٹم نہ لگانے والوں کے خلاف بھی سخت کارروائی عمل میں لائی جائے گی۔
ان کا یہ بھی کہنا تھا کہ کھلی جگہوں پردھواں، چکنائی اور بدبو پھیلانے پر کارروائی ہوگی۔ ڈی جی نے ماتحت عملے کو خلاف ورزی کرنے والے ہوٹل مالکان کے خلاف تحت فوری جرمانے اور مقدمات درج کرانے کی بھی ہدایت کی ہے









