ڈیرہ مراد جمالی: ریلوے اسٹیشن کے قریب ریلوے پل کی پیڑی پر دھماکے میں جعفرآباد ایکسپریس تباہی سے بال بال بچ گئی۔
تفصیلات کے مطابق نصیرآباد کے شہر ڈیرہ مراد جمالی ریلوے اسٹیشن کے قریب ریلوے پل کی پیڑی پر زور دار دھماکہ ہوا تاہم خوش قسمتی سے جعفرآباد ایکسپریس بڑی تباہی سے بچ گئی۔
پولیس کا کہنا تھا کہ دھماکہ جعفرآباد ایکسپریس کے پائلٹ انجن کے گزرنے کے فوراً بعد پیش آیا، جبکہ کچھ ہی دیر بعد جعفرآباد ایکسپریس ٹرین کو اسی ٹریک سے گزرنا تھا۔
ایس ایس پی غلام سرور بھیو نے کہا کہ دھماکے سے ریلوے پیڑی کو تقریباً چار فٹ تک نقصان پہنچا اور جائے وقوعہ سے خون اور گوشت کے ٹکڑے ملے ہیں، تاہم یہ کہنا قبل از وقت ہوگا کہ دھماکہ خودکش نوعیت کا تھا یا نہیں۔
پولیس اور قانون نافذ کرنے والے اداروں نے علاقے کو گھیرے میں لے کر شواہد اکٹھے کرنے کا عمل شروع کر دیا ہے۔
یاد رہے دو روز قبل سلطان کوٹ اسٹیشن کے قریب ریلوے ٹریک پر دھماکے سے جعفر ایکسپریس کی 5 بوگیاں پٹڑی سے اتر گئی تھیں۔
حکام کے مطابق راولپنڈی سے کوئٹہ جانے والی جعفر ایکسپریس کی 5 بوگیاں پٹڑی سے اترنے سے 6 مسافر زخمی ہوئے تھے۔
سکیورٹی ذرائع کا کہنا تھا کہ ریلوے ٹریک کو دھماکے سے اڑانے میں کالعدم بی ایل اے ملوث ہے۔
