کینیڈا نے بھارت کی بشنوئی گینگ کو دہشت گرد تنظیم قرار دے دیا۔
کینیڈین حکومت نے بشنوئی گینگ کو دہشتگرد تنظیموں کی فہرست میں شامل کرتے ہوئے کہا ہے کہ بشنوئی گینگ مخصوص کمیونٹیز کو دہشت، تشدد اور دھمکیوں کا نشانہ بنا رہی تھی۔
دہشت گرد لسٹ میں شامل ہونے کے بعد کینیڈین حکومت املاک، گاڑیاں، رقم ضبط کر سکےگی جب کہ کینیڈین اداروں کو دہشت گردی کے مقدمات میں اضافی اختیارات بھی مل گئے ہیں۔
بشنوئی گینگ کا آغاز بھارت کی پنجاب اور ہریانہ ریاستوں سے ہوا تھا جس کے بارے میں میڈیا رپورٹس میں بتایا گیا کہ گینگ کی بڑی آمدنی منشیات اسمگلنگ اور بھتہ خوری سے آتی ہے۔
بھارت کی نیشنل انویسٹی گیشن ایجنسی (این آئی اے) نے گینگسٹر لارنس بشنوئی کے بھائی انمول بشنوئی انتہائی مطلوب دہشتگرد کی فہرست میں شامل کر لیا۔
میڈیا رپورٹس کے مطابق انسداد دہشتگردی ایجنسی نے انمول بشنوئی کی گرفتاری کیلیے 10 لاکھ روپے انعام کا اعلان کیا ہے۔ انمول بالی وڈ سُپر اسٹار سلمان خان کی رہائش گاہ کے باہر پیش فائرنگ کرنے کے سلسلے میں پولیس کو مطلوب ہے۔
انمول بشنوئی، لارنس بشنوئی اور کینیڈا میں مقیم گینگسٹر گولڈی برار سلمان خان کے گھر کے باہر فائرنگ سے متعلق کیس میں نامزد ملزمان میں شامل ہیں۔ اس معاملے میں ممبئی پولیس نے بشنوئی گینگ کے پانچ ارکان کو گرفتار کیا ہے۔
یاد رہے کہ بابا صدیقی قتل کیس میں بھی انمول کا نام سامنے آیا تھا۔ 66 سالہ سیاستدان کو 12 اکتوبر کی شام ممبئی کے علاقے باندرہ میں سڑک پر گولیاں مار کر ہلاک کیا گیا تھا۔
بھارتی میڈیا کا کہنا ہے کہ اس بار لارنس بشنوی گینگ کے رکن ہیری باکسر نے ایک آڈیو پیغام جاری کرتے ہوئے کہا ہے کہ جو بھی پروڈیوسر، ہدایت کار یا اداکار دبنگ خان کے ساتھ کام کرے گا، اسے گولی مار دی جائے گی۔
یہ دھمکی کینیڈا میں کپل شرما کے کیفے کے باہر فائرنگ کے ایک دن بعد دی گئی ہے کیونکہ کپل شرما بھی سلمان خان کے کامیڈی شو کی میزبانی کرتے ہیں اور ان کے ماتحت کام کرتے ہیں
