ایشیا کپ 2025: بھارتی کپتان نے آج بھی پاکستانی کپتان سے ہاتھ نہیں ملایا!

ایشیا کپ کے سپر فور مرحلے کا سب سے بڑا مقابلہ پاکستان اور بھارت کے درمیان آج دبئی میں کھیلا جا رہا ہے۔ ٹاس ہوچکا ہے اور بھارتی کپتان نے ٹاس جیت کر پہلے فیلڈنگ کا فیصلہ کیا ہے۔ تاہم اس میچ میں بھی بھارتی کپتان کی ہٹ دھرمی برقرار رہی۔
ٹاس کے بعد بھارتی کپتان سوریہ کمار یادیو نے پاکستانی کپتان سلمان علی آغا سے ہاتھ نہیں ملایا اور ٹاس جیتنے کے بعد روی شاستری سے فیصلے اور اسکواڈ سے متعلق گفتگو کر کے منظر نامہ سے چلے گئے۔
اس سے قبل گزشتہ اتوار کو کھیلے گئے میچ میں بھی ٹاس کے وقت بھارتی کپتان نے ہاتھ نہیں ملایا تھا جب کہ میچ کے اختتام پر بھارتی ٹیم بغیر مصافحہ کیے میدان سے واپس لوٹ کر اسپورٹس مین اسپرٹ کی دھجیاں بکھیر چکی تھی۔
بعد ازاں بھارتی کپتان نے انکشاف کیا تھا کہ انہیں مودی سرکار اور بی سی سی آئی نے پاکستانی کرکٹرز سے مصافحہ کرنے سے منع کیا تھا، جبکہ میچ ریفری اینڈی پائی کرافٹ نے انکشاف کیا کہ انہوں نے بی سی سی آئی کے کہنے پر پاکستانی کپتان کو بھارتی کپتان سے ہاتھ نہ ملانے کا کہا تھا۔
مذکورہ واقعہ کے بعد پی سی بی نے سخت ایکشن لیتے ہوئے میچ ریفری اینڈی پائی کرافٹ کو ایشیا کپ سے باہر کرنے اور بصورت دیگر ایشیا کپ سے دستبردار ہونے کی دھمکی دی تھی۔
تاہم چار روز تک یہ ڈراما جاری رہنے کے بعد پاکستان نے اسی میچ ریفری کی نگرانی میں نہ صرف یو اے سی سے میچ کھیلا بلکہ آج پاک بھارت میچ میں بھی اینڈی پائی کرافٹ ہی میچ سپروائز کر رہے ہیں