پولیس نے بروقت کارروائی کرتے ہوئے دو مسلح ڈاکوؤں کو گرفتار کر لیا

کراچی(18 ستمبر 2025): سائیٹ اے پولیس نے بروقت کارروائی کرتے ہوئے راہگیر کو لوٹ کر فرار ہونے والے دو مسلح ڈاکوؤں کو تعاقب کرکے گرفتار کر لیا۔
  تفصیلات کے مطابق ایس ایس پی کیماڑی کیپٹن (ر) فیضان علی نے کہا ہے کہ ملزمان کی شناخت سعید اور عبد الرحمان کے ناموں سے ہوئی ہے، موٹر سائیکل سوار دو مسلح ملزمان منگھو پیر روڈ اسپتال کے پاس انس نامی شخص کو لوٹ کر فرار ہوئے۔
حکام کا کہنا ہے کہ متاثرہ شخص نے فوری طور پر اطلاع علاقہ گشت پر مامور پولیس پارٹی کو دی، ملزمان کے قبضے سے غیرقانونی 9 ایم ایم پستول، چھینا گیا موبائل فون و دیگر سامان برآمد کرلیا گیا۔
فیضان علی نے کہا کہ ملزمان اس سے قبل بھی پولیس مقابلہ سمیت ڈکیتی و دیگر مقدمات میں گرفتار ہوکر جیل جا چکے ہیں۔
دوسری جانب شہر قائد کے علاقے فیڈرل بی ایریا بلاک 14 میں ڈکیتی کی کوشش کے دوران مزاحمت پر 20 سالہ شہری جگو ڈاکوؤں کی فائرنگ سے زخمی ہو گیا، واقعے کی اطلاع ملتے ہی پولیس موقع پر پہنچی جس پر ملزمان نے فرار ہوتے ہوئے پولیس پر بھی فائرنگ کر دی۔
پولیس حکام کے مطابق جوابی کارروائی میں ایک ڈاکو ہلاک جبکہ دوسرا زخمی حالت میں گرفتار کر لیا گیا۔