ایران اور اقوام متحدہ کے جوہری نگران ادارے کے درمیان تعاون بحال کرنے کے معاہدے پر دستخط

ایران اور اقوام متحدہ کے جوہری نگران ادارے ( آئی اے ای اے ) کے درمیان تعاون بحال کرنے کے معاہدے پر دستخط ہوگئے۔
بین الاقوامی خبر رساں ادارے کی رپورٹ کے مطابق ایرانی وزیرخارجہ عباس عراقچی اور عالمی جوہری نگران ادارے کے ڈائریکٹر نے مصر میں ہونے والے اس معاہدے پر دستخط کیے۔
رپورٹس کے مطابق اس معاہدے میں ایران کی جوہری تنصیبات کے معائنے کی بحالی بھی شامل ہے تاہم اس معاہدے کی مزید تفصیلات جاری نہیں کی گئیں۔
یہ معاہدہ مصر کے وزیر خارجہ بدر عبدالعاطی، ایران کے وزیر خارجہ عباس عراقچی اور آئی اے ای اے کے ڈائریکٹر جنرل رافیل گروسی کے درمیان ملاقات کے بعد سامنے آیا۔
قطر پر حملے کا فیصلہ اسرائیلی وزیراعظم کا تھا میرا نہیں، ٹرمپ
مشترکہ پریس کانفرنس میں گروسی کا کہنا تھا کہ یہ معاہدہ تکنیکی نوعیت کا ہے اور یہ قدم درست سمت میں اٹھایا گیا ہے۔
واضح رہے کہ آئی اے ای اے کے ڈائریکٹر جنرل رافیل گروسی نے اعلان کیا تھاکہ ایجنسی کو توقع ہے کہ وہ چند دنوں میں ایرانی حکام کے ساتھ ملک میں اپنی مکمل کارروائیوں کو دوبارہ شروع کرنے کے حوالے سے ایک معاہدے تک پہنچنے میں کامیاب ہوجائیں گے۔