نامور گلوکارہ صنم ماروی اور آرٹس کونسل آف پاکستان کراچی کے صدر احمد شاہ کے درمیان جاری تنازع باہمی معافی اور مفاہمت کے بعد ختم ہوگیا ہے۔ چند روز قبل صنم ماروی نے احمد شاہ کو 5 کروڑ روپے ہرجانے کا قانونی نوٹس بھیجا تھا، جس میں الزام لگایا گیا تھا کہ 10 اگست کو سکھر میں سندھ حکومت کے ایک پروگرام کے دوران انہیں دھکے دیے گئے، نازیبا زبان استعمال کی گئی اور دھمکیاں دی گئیں۔

احمد شاہ نے ان الزامات کو مسترد کیا تھا، تاہم صوبائی وزیر ثقافت سید ذوالفقار علی شاہ اور معروف لکھاری نور الہدیٰ شاہ کی کوششوں سے دونوں شخصیات کے درمیان صلح ہوگئی۔ وزیر ثقافت نے ایک ویڈیو شیئر کی جس میں احمد شاہ نے صنم ماروی کو اپنی بیٹی اور چھوٹی بہن قرار دیا اور کہا کہ معاملہ محض غلط فہمی کا نتیجہ تھا۔ انہوں نے تسلیم کیا کہ ان کے اسٹاف کے رویے سے گلوکارہ کو تکلیف پہنچی۔

صنم ماروی نے بھی سندھی زبان میں ایک بیان میں تمام الزامات واپس لیتے ہوئے صلح میں کردار ادا کرنے والوں کا شکریہ ادا کیا اور کہا کہ وہ سندھ کے عوام کی شکر گزار ہیں۔