پاکستانی کرکٹ ٹیم کے سابق ڈائریکٹر اور سابق ہیڈکوچ مکی آرتھر کا بابراعظم اور رضوان کو ایشیا کپ ٹی ٹوئنٹی کے اسکواڈ میں شامل نہ کرنے پر ردعمل سامنے آیا ہے۔
خیال رہےکہ ایشیا کپ ٹی ٹوئنٹی فارمیٹ میں 9 سے 28 ستمبر تک متحدہ عرب امارات میں کھیلا جائےگا، اعلان کردہ پاکستانی اسکواڈ میں سابق کپتان بابر اعظم اور محمد رضوان شامل نہیں ہیں۔
ایک حالیہ انٹریو میں قومی ٹیم کے سابق ہیڈکوچ مکی آرتھر کا کہنا تھا کہ ٹی ٹوئنٹی کرکٹ بہت تیزی سے بدل چکی ہے اور آپ کو اپنے کھیل کے انداز کو وقت کے ساتھ بدلنا پڑتا ہے، یقیناً بابر اور رضوان بہت اچھےکھلاڑی ہیں، تاہم پاکستان وائٹ بال ٹیم کے ہیڈکوچ مائیک ہیسن اور ٹی ٹوئنٹی کےکپتان سلمان علی آغا نے ایک وژن کے تحت مخصوص برانڈ آف کرکٹ تیار کی ہے اور وہ ایسے کھلاڑی چن رہے ہیں جو اسے عملی شکل دے سکیں۔
مکی آرتھر کا مزید کہنا تھا کہ مائیک ہیسن بہترین کوچ ہیں، میں ان کا بہت احترام کرتا ہوں، مجھے یقین ہے کہ وہ پاکستان کرکٹ کے لیے زبردست کام کریں گے۔
