وفاقی حکومت نے آئی ایم ایف کی ایک اور شرط پر عمل درآمد مکمل کرتے ہوئے ایف بی آر سے ٹیکس پالیسی بنانے کا اہم اختیار واپس لے لیا، وفاقی کابینہ نے وزارت خزانہ میں ٹیکس پالیسی آفس قائم کردیا جس کا نوٹیفکیشن جاری کردیا گیا ہے۔
ڈان نیوز کے مطابق حکومت نے ٹیکس پالیسی بنانے اور ٹیکس وصولی کو علیحدہ علیحدہ کردیا، اب ایف بی آر صرف ٹیکس وصولی کے کام کی حد تک محدود رہے گا اور ریونیو بڑھانے کے لیے صرف ٹیکس تجاویز پرعمل درآمد پر توجہ دے گا۔
وزارت خزانہ کے نوٹیفکیشن کے مطابق ٹیکس پالیسی آفس براہ راست وزیر خزانہ وریونیو کو رپورٹ کرے گا، ٹیکس پالیسی آفس حکومتی اصلاحاتی ایجنڈا بنانے پر کام کرے گا، ٹیکس پالیسی آفس ٹیکس پالیسیوں اور تجاویز کا تجزیہ کرے گا، ڈیٹا ماڈلنگ، ریونیو اور معاشی پیشگوئی کے ذریعے ٹیکس پالیسیوں اور تجاویز کا تجزیہ کیا جائے گا۔
