جسٹس امین الدین خان کی سربراہی میں 7 رکنی آئینی بینچ نے سماعت کی، معاون وکیل رانا وقار نے عدالت کو بتایا کہ سلمان اکرم راجہ ٹریفک کے سبب نہیں پہنچ سکے، سپریم کورٹ آنے کیلئے صرف ایک ہی راستہ مارگلہ روڈ والا کھلا ہے۔
جسٹس جمال مندوخیل نے ریمارکس دیے کہ خواجہ حارث صاحب پہنچ گئے،باقی لوگ بھی پہنچ گئے، آپ بھی تو آ گئے ہیں،اگر آدھا گھنٹہ پہلے نکل آتے اس وقت سپریم کورٹ ہوتے، لگتا ہے وکلا چاہتے ہیں لوگ قید میں سڑتے رہیں، ٹھیک ہے وکلا نہیں چاہتے تو کیا کیا جاسکتا ہے۔
بعد ازاں فوجی عدالتوں میں عام شہریوں کے ٹرائل سے متعلق کیس کی سماعت کل تک ملتوی کردی گئی، حکمنامے میں کہا گیا ہے کہ کیس سماعت کیلئے پکارا گیا،سلمان اکرم راجہ عدالت میں موجود نہیں تھے، ویڈیو لنک پر بھی کوئی وکیل دلائل دینے کیلئے دستیاب نہیں تھا۔