بھارتی کرکٹ ٹیم کے کپتان روہت شرما نے اپنی ریٹائرمنٹ سے متعلق سوشل میڈیا پر چلنے والی خبروں پر ردعمل دیتے ہوئے کہا کہ وہ ٹیسٹ کرکٹ سے ریٹائر نہیں ہورہے بلکہ آؤٹ آف فارم ہونے کی وجہ سے آسٹریلیا کے خلاف آخری میچ میں حصہ نہیں لیا۔
کھیلوں کی ویب سائٹ ’کرک انفو‘ کی رپورٹ کے مطابق بھارتی ٹیم کے کپتان روہت شرما نے ’اسٹار اسپورٹس سے بات کرتے ہوئے اپنی ریٹائرمنٹ سے متعلق قیاس آرائیوں پر جواب دیا۔
ان کا کہنا تھا ’سڈنی ٹیسٹ سے باہر رہنے کے فیصلے کو ریٹائرمنٹ کا فیصلہ نہیں سمجھا جانا چاہیے، مائیک، قلم یا لیپ ٹاپ رکھنے والے یہ فیصلہ نہیں کر سکتے کہ کسی کھلاڑی کو کب ریٹائر ہونا چاہیے‘۔
بھارتی کپتان نے کہا کہ باہر بیٹھے لوگ یہ فیصلہ نہیں کرسکتے کہ مجھے کب باہر بیٹھنا چاہیے، کب کپتانی کرنی چاہیے، میں ایک سمجھدار انسان ہوں، بالغ ہوں اور دو بچوں کا باپ ہوں۔ تو میں جانتا ہوں کہ کب کیا فیصلہ کرنا ہے۔
آسٹریلیا کے خلاف بارڈر گواسکر ٹیسٹ سیریز کا چوتھا میچ ہارنے کے بعد روہت شرما پر بھارت میں شدید تنقید کی جارہی تھی کیوں کہ اس شکست کے بعد بھارت کے ورلڈ ٹیسٹ چیمپئن شپ کے فائنل میں پہنچنے کے امکانات تقریباً ختم ہوگئے ہیں۔
