کراچی: کراچی ایئرپورٹ پر بیرون ملک جانیوالی پروازوں کے غیر معمولی رش کے باعث مسافروں کو پریشانی کا سامنا کرنا پڑا اور امیگریشن پر قطاریں لگ گئیں۔
تفصیلات کے مطابق کراچی میں ائیر ٹرانسپورٹ کی مبینہ بدانتظامی کے باعث ایک ساتھ 10 سے زائد فلائٹس کا شیڈول جاری کردیا گیا۔
جناح انٹرنیشنل ایئرپورٹ پر بیرون ملک جانیوالی پروازوں کا غیر معمولی رش دیکھنے میں آیا ، صبح رش کے باعث پروازوں کی روانگی میں کئی گھنٹے تاخیر سے مسافروں کو پریشانی کا سامنا کرنا پڑا۔
کراچی سے مدینہ جانیوالی پی آئی اے کی پرواز 3 گھنٹے تاخیر سے روانہ ہوئی جبکہ سعودی عرب بینکاک اور دیگر بیرون ملک جانیوالی پروازوں کا شیڈول بھی متاثر یوا۔
کراچی ایئرپورٹ امیگریشن پر مسافروں کی قطاریں لگ گئیں اور ایک ساتھ 10 پروازیں لگنے سے امیگریشن کے عملے کو بھی پریشانی کا سامنا کرنا پڑا۔
دوسری جانب پنجاب میں موسم کی خرابی کی وجہ سے لاہور، سیالکوٹ، فیصل آباد اور ملتان میں فلائٹ آپریشن شدید متاثر ہوا جبکہ 8 پروازیں متبادل ایئر پورٹ پر اتاری گئیں۔
شدید دھند کے باعث 3 پروازیں منسوخ کردی گئیں جبکہ 96 پروازیں تاخیر کا شکار ہوئیں اور گزشتہ رات 3 سے صبح 6 بجے تک لاہور ایئرپورٹ کا فلائٹ آپریشن شدید متاثر رہا۔
