جامعہ کراچی کی انتظامیہ نے کئی عشروں پر محیط اپنی داخلہ پالیسی کو تبدیل کرنے کا اصولی فیصلہ کرلیا ہے ایکسپریس نیوز کے مطابق آئندہ داخلے انٹر سال اول کے نتائج کی بنیاد پر دینے کا فیصلہ کیا گیا ہے جبکہ بی ایس مارننگ اورایوننگ پروگرام کے داخلے نومبر کے بجائے جولائی 2025 میں شروع کردیے جائیں گے اور سیشن بھی اگست سے شروع کیا جاسکتا ہے۔
جامعہ کراچی کے وائس چانسلرخالد محمود عراقی نے ایکسپریس سے گفتگو کرتے ہوئے کہا کہ یہ فیصلہ بہتر نتائج کے حامل اچھا اکیڈمک پس منظر رکھنے والے طلبہ کے لیے کیا جارہا ہے۔
وائس چانسلر کا کہنا تھا کہ شہر کی کئی جامعات سال کے وسط میں داخلوں کا اعلان کردیتی ہیں، جس کے سبب ذہین طلبہ کی ایک بڑی تعداد پہلے ہی ان جامعات کا رخ کرلیتی ہے جبکہ ہم چاہتے ہیں کہ جامعہ کراچی میں جو طلبہ داخلہ لے رہے ہیں ان کا معیار بھی یونیورسٹی کی شایان شان ہو۔ اس سلسلے میں باقاعدہ ورکنگ پیپر تیار کرکے اکیڈمک کونسل میں منظوری کے لیے پیش کیا جائے گا۔
