ترکیہ میں دہشتگرد حملہ

انقرہ: بدھ کے روز ترکی نے اعلان کیا کہ انقرہ کے نواحی علاقے کہرامنکازان میں واقع ترکی ایرواسپیس انڈسٹریز (TUSAS) کے ہیڈکوارٹر پر ایک ہلاکت خیز دہشتگرد حملہ کیا گیا ہے۔ میڈیا رپورٹس کے مطابق، موقع پر ایک زور دار دھماکہ ہوا اور فائرنگ کی آوازیں سنائی دیں، جبکہ فوٹیج میں گولیوں کا تبادلہ بھی دیکھا گیا۔
وزیر داخلہ علی یرلیکایا نے سوشل میڈیا پلیٹ فارم X پر جاری ایک بیان میں کہا، “TUSAS کی تنصیبات پر دہشتگرد حملہ کیا گیا ہے، جس کے نتیجے میں بدقسمتی سے ہمارے کچھ افراد شہید اور زخمی ہوئے ہیں۔” دھماکے اور فائرنگ کی وجوہات تاحال غیر واضح ہیں، تاہم کچھ میڈیا ذرائع کے مطابق یہ ایک خودکش حملہ تھا۔ سرکاری خبر رساں ادارے اناطولو ایجنسی نے اطلاع دی کہ ایمرجنسی سروسز کو فوری طور پر جائے وقوعہ پر روانہ کیا گیا۔
ٹیلی ویژن پر نشر ہونے والی تصاویر میں ایک تباہ شدہ گیٹ اور ایک قریبی پارکنگ لاٹ میں جھڑپ کے مناظر دکھائے گئے۔
TUSAS ترکی کی سب سے اہم دفاعی اور فضائی صنعتوں میں شمار ہوتی ہے، جو ملک کے پہلے قومی جنگی طیارے “KAAN” سمیت کئی اہم منصوبے تیار کر رہی ہے۔