اسرائیل کے وزیرِ اعظم بن یامین نیتن یاہو نے لبنان کو خبردار کیا ہے کہ اگر حالات مزید بگڑے تو اسے بھی غزہ کی طرح تباہی کا سامنا کرنا پڑ سکتا ہے۔
غیرملکی خبر رساں ادارے کی رپورٹ کے مطابق اپنے ایک حالیہ جاری بیان میں نیتن یاہو نے لبنان کے لوگوں سے مخاطب ہو کر کہا کہ آپ کے پاس موقع ہے کہ لبنان کو ایک طویل جنگ کے دلدل میں جانے سے بچالیں جو ویسے ہی تباہی اور تکلیف لائے گی جیسی ہم غزہ میں دیکھ رہے ہیں۔
نیتن یاہو کا کہنا تھا کہ میں لبنان کے عوام سے کہنا چاہتا ہوں کہ اپنے ملک کو حزب اللہ سے آزاد کرائیں تاکہ یہ جنگ ختم ہو سکے۔
رپورٹ کے مطابق اسرائیل نے حزب اللہ کے خلاف اپنی زمینی کارروائیوں کا دائرہ جنوبی لبنان کے ساحلی علاقوں تک پھیلا دیا ہے۔ اسرائیلی فوج نے گزشتہ رات جنوبی بیروت میں حملہ کرکے 4رہائشی عمارتوں کو تباہ کردیا۔
اسرائیل نے لبنان میں حزب اللہ کے ٹھکانوں کو بھی نشانہ بنایا ہے، اور جنوبی بیروت میں بھی حملے کیے ہیں، جن میں اب تک مجموعی طور 1ہزار150 سے زائد لبنانی شہید اور لاکھوں لوگ بے گھر ہوگئے ہیں۔
دوسری جانب حزب اللہ کی قیادت نے اسرائیلی حملوں کے باوجود مزاحمت جاری رکھنے کا عزم ظاہر کیا ہے جب کہ اسرائیل کے وزیر دفاع نے دعویٰ کیا ہے کہ حزب اللہ کی قیادت اب کمزور ہو چکی ہے۔
اقوام متحدہ کی امن فورس کو بھی اسرائیلی فوج سے خطرات لاحق
رپورٹ میں کہا گیا ہے کہ اسرائیل حزب اللہ تنازع نے خطے کے دیگر ممالک کو بھی متاثر کیا ہے، جیسے کہ شام اور یمن، جہاں ایران سے وابستہ گروہوں کے ساتھ جھڑپیں جاری ہیں۔
