کیماڑی: ضلع کیماڑی کے اینٹی اسٹریٹ کرائم سیل نے خفیہ اطلاع پر کارروائی کرتے ہوئے پوش علاقوں میں منعقدہ ڈانس پارٹیوں میں آئس اور نشہ آور گولیاں (ڈانسنگ پلز) سپلائی کرنے والے دو ملزمان کو گرفتار کر لیا۔
ایس ایس پی کیماڑی کیپٹن (ر) فیضان علی کے مطابق، ملزمان کی شناخت محمد ایاز ولد معین الدین اور جنید ولد محمد اکبر کے ناموں سے ہوئی ہے۔ ان کے قبضے سے 50 گرام آئس اور 400 عدد نشہ آور گولیاں برآمد کی گئیں۔
ملزمان نے دوران انٹروگیشن انکشاف کیا کہ وہ نشہ آور گولیاں پشاور، خیبر پختونخوا سے بذریعہ کارگو سروس منگواتے تھے۔ یہ منشیات اور گولیاں شہر کے پوش علاقوں میں منعقدہ ڈانس پارٹیوں میں فروخت کی جاتی تھیں۔
ایس ایس پی نے مزید بتایا کہ نشہ آور ادویات مختلف مقامات پر آن کال فراہم کی جاتی ہیں۔ ملزمان کو انچارج اینٹی اسٹریٹ کرائم سیل سب انسپکٹر راجہ خالد کی قیادت میں کارروائی کرتے ہوئے بڑا بورڈ منگھوپیر روڈ سے گرفتار کیا گیا۔
ملزمان کے خلاف تھانہ پاک کالونی میں مقدمہ درج کرکے مزید تفتیش کی جا رہی ہے۔ یہ کارروائی علاقے میں منشیات کی روک تھام کے لئے ایک اہم قدم ہے۔
